Të gjithë në nderim të një njeriu!

Shtatori do të shënojë një ngjarje të madhe për botën e veçanërisht për emrin e një shqiptareje: Nënë Tereza. Lajmi se Nënë Tereza do të shenjtërohet në shtator i lumturoi të gjithë shqiptarët, por jo vetëm, pasi Vatikani me në krye Papa Françeskun njohu mrekullinë e dytë të njeriut simbol të paqes dhe dashurisë njerëzore. Por më 3 shtator 2016, në Vatikan do të mbahet një koncert i madh ku do të prezantohet himni për Nënë Terezën, duke përkuar me shenjtërimin e saj.

‘Më 3 shtator do të mbahet një koncert i madh’, ka rrëfyer për Wake Up kompozitori i himnit, Genc Tukiçi, ‘ku do të jenë të pranishëm figurat më të shquara shqiptare në të gjithë botën. Do të jetë Ismail Kadare, Robert De Niro, Ermonela Jaho, Rita Ora, personalitetet më të shquara shqiptare në botë’

Aktori 2 herë fitues i çmimit Oscar, Robert De Niro, deklaroi prejardhjen e tij shqiptare si i ftuar special në Sanremo-n e 2011-ës. Ai do pritet të jetë i pranishëm në Vatikan për të nderuar shenjtin shqiptar, së bashku me emrat më të njohur shqiptarë. Kompozitori Tukiçi shprehet shumë i nderuar që himni i kompozuar prej tij do të këndohet në një event të tillë, nga sopranoja Inva Mula: ‘Kam fatin që do të këndohet nga 1 prej këngëtareve më të mëdha në botë, Inva Mula’.

Tukiçi ka treguar edhe sesi lindi ideja e këtij himni, që u prezantua fillimisht në Prishtinë: ‘Ishte ideja e një gazetareje të njohur në Maqedoni, Diana Toska’, i ka thënë ai moderatorëve Eno Popi e Mira Kazhani, ‘Krijimi i këngës ka përfunduar në qershor të 2015-ës’ I pyetur se cila është natyra e këngës, Tukiçi ka shpjeguar se është një ‘vals që nis si një vals i thjeshtë, e më pas kthehet në një vals gjigand’ E në fakt, edhe titulli i himnit është ‘Valsi Hyjnor’.

‘Është një vals imagjinar, shumë human me Nënë Terezën’, ka treguar Tukiçi, ‘Është krijuar me idenë që kur ta dëgjojnë, të gjithë të përfytyrojnë sikur po kërcejnë një vals me Nënë Terezën, një figurë shumë humane’. Himni është krijuar në bazë të një teme prej kompozitorit të shquar shqiptar, Lorenc Antoni. Vargjet e tij janë ndërtuar mbi fraza të shkëputura nga letrat që Gonxhe Bojaxhiu, i dërgonte nënës së saj ndërsa ishte larg, me misionin e saj humanitar nëpër botë.

Dëgjoni ‘Valsin Hyjnor’ të ekzekutuar në Prishtinë në shtator të 2015-ës: