Poroshenko dhe Erdogan po mbyten, kë do shpëtonit të parin?

Varia Kuznetsova, një vajzë 12 vjeç, i dërgoi një pyetje presidentin rus Vladimir Putin, në kuadër te “Linjës direkte”. “Nëse presidenti i Ukrainës, Petro Poroshenko dhe Presidenti i Turqisë, Recep Tayyip Erdogan, rrezikojnë të mbyten, kë do të shpëtonit të parin?”, pyet vogëlushja.

“Varia, po më vë në një situatë shumë të sikletshme”, filloi të përgjigjej Putin. “Rusia është e gatshme t’i shtrijë dorën e miqësisë çdo politikani nëse ai dëshiron, por nëse një person vendos të mbytet, atëherë është e pamundur që ta shpëtoj”, tha presidenti rus.

“Ne nuk jemi dhe as do të jemi të rrethuar nga kundërshtarë në një rreth armiqësor. Kjo është përjashtuar në mënyrë absolute. Kemi marrëdhënie shumë të mira me pjesën më të madhe të vendeve të botës”, shtoi presidenti rus.

Përveç kësaj, Putin ka thënë se Turqia është “një vend mik” ashtu siç dhe “populli turk është mik i popullit tonë”. Megjithatë, presidenti rus tha se “kemi probleme me disa politikanë dhe figura të caktuara, sjellja e të cilëve duket e papërshtatshme dhe reagojmë ndaj kësaj në mënyrën e duhur”.

“Linja direkte” e Vladimir Putin ka filluar në 9:00 të ditës së sotme. Ashtu si dhe në vitet e mëparshme, njerëzit nga të gjitha rajonet e Rusisë mund të dërgojnë pyetjet e tyre në mënyra të ndryshme, që nga mesazhet përmes një qendre përpunimi deri te videot e shkurtra duke përdorur një aplikacion të veçantë për telefonat celularë, ose në një faqe interneti e krijuar për këtë rast. Ky është sezoni i 14-të i programit, që zakonisht zgjat 3.5 – 4 orë. Edicioni më i gjatë u zhvillua në vitin 2011 dhe arriti 4 orë e 32 minuta.