Kjo mjekësi që është kthyer në një grup kriminal

Tronditës ka qenë rrëfimi i Kastro Zizos mbrëmjen e sotme në emisionin Zonë e Lirë. “Lajmin se ishte e sëmurë e kam marrë vesh ditën e lindjes së saj.

Më 5 mars unë mora vesh që njeriut më të shtrenjtë për mua nuk i kishte mbetur shumë kohë jetë. Ndonëse sëmundja i’u shfaq para 8 viteve, 2 vite më parë unë vendosa t’i jepja asaj një nip sepse parandjeja që diçka e keqe do ndodhte. Ndonëse besova pafund në Zot, më 29 mars ajo më vdiq në duar” ka treguar ai me lot në sy.

Por ajo që ja shton dhimbjen Kastros, është fakti që nëna e tij mund të kishte jetuar më gjatë, nëse sipas këngëtarit, ajo do kishte marrë ilaçin që i duhej. “Javën që nëna ime ishte e shtruar në QSUT, 9 të tjerë humbën jetën për shkak të kancerit sepse s’mundën të merrnin ilaçin që u duhej. Shishja e vogël e medikamentit dhe kura e kimioterapisë, që kushtojnë 2000 euro, mund t’ja kishin zgjatur jetën nënës time. Ka shumë njerëz që s’marrin dot as gjysmën e kurës sepse s’kanë para, apo që nuk ngrenë dot zërin sepse s’kanë frymë për ta bërë. Kjo mjekësi që është kthyer në një grup kriminal, po u merr jetën njerëzve” ka thënë ai në mbyllje të rrëfimit të tij.