Helikopteri transportonte mermer?

Ndërsa ende nuk ka një version zyrtar për rrethanat dhe shkaqet e rrëzimit të helikopterit të Forcave të Armatosura sot në Liqenin e Shkodrës, kanë nisur të qarkullojnë dyshimet e para. Gazetari i Report Tv dhe Shqiptarja.com në Shkodër, Elvis Nabolli shkruan në faqen e tij në Facebook se helikopteri transportonte mermer për në shtëpinë e ministres Mimi Kodheli në Vermosh.

“Helikopteri i rrëzuar në liqenin e Shkodrës po transportonte mermer për në shtëpinë e Ministres në Vermosh??? Nqs kjo është e vertetë, skam fjalë. Po thonë te dogana helikopteri ka shkëmby diçka me një furgon të gjatë mallrash. O prokuroria a jeni gjalleeeeeeee?” shkruan Elvis Nabolli.

Dyshime për ngjarjen kanë edhe gazetarë të tjerë lokalë në Shkodër, ndërsa pak pas ngjarjes ra në sy publikisht nervozizmi që shoqëronte ministren e Mbrojtjes Mimi Kodheli dhe ministrin e Shëndetësisë, Ilir Beqaj. Ky i fundit u soll keq në spitalin e Shkodrës me gazetarin e “Zërit të Amerikës”, ndërsa Kodheli u është drejtuar operatorëve të televizioneve me fjalët “…m’i hiqni ato kamera”.

Helikopteri është ende nën ujë, ndërsa në sipërfaqe është parë plastmas, duke shtuar dyshimet se diçka po transportohej. Sidoqoftë ngjarja vazhdon të ketë shumë të panjohura. Hetimi dhe ekspertiza do të hedhin më shumë dritë mbi atë që ndodhi me helikopterin e Forcave të Armatosura, i blerë në vitin 2015. Pilotët Floran Deliaj dhe toger Donald Hoxha humbën jetën, ndërsa i plagosur ka mbetur ushtari profesionist, Gerald Baramuça./Lapsi