Porti i Shëngjinit qenka i LSI-së, jo i qeverisë

Porti i Shëngjinit paska marrë një çmim ndërkombëtar. Çmimi është i artë dhe ai është dhënë për cilësi, menaxhim, lidership dhe planfikim strategjik. Çmimin e ka dhënë organizata ndërkombëtare për certifikimin e cilësisë “BID grup”. Çmimi “Quality Era Award” i është dorëzuar në Gjenevë të Zvicrës, Drejtorit të Portit të Shëngjinit Gjovalin Tushaj i cili ishte i pranishëm në ndarjen e çmimeve të përvitshme ku merrnin pjesë përfaqësues nga 178 vende të ndryshme të botës.
Të gjitha këto të dhëna ngazëllyese eklipsohen nga fakti se njoftimin për shtyp për një ent si porti i Shëngjinit e jep Zyra e Shtypit e Lëvizjes Socialiste për Integrim që drejtohet nga Ilir Meta. “Sekreti” është i thjeshtë: aty ku ndonjë ndërmarrje shtetërore shkëlqen, apo merr çmime, duhet të dalë që ato drejtohen nga LSI-ja. Me siguri që njoftimi është përcjellë sot, për të mos u konsideruar si shaka e 1 prillit, ndonëse shakaja është gjysma e së vërtetës. Mund të pyetet pse vallë nuk është Ministria e Transporteve që drejtohet nga Haxhinasto, ministri që nuk po bën dot një konçesion, që ta përcjellë këtë lajm? Një përgjigje eventuale do të ishte: sa të sigurtë jemi që Haxhinasto është i LSI-së? Pa folur këtu për çorbën e marrëveshjes me TIA-n për Rinasin, ku ministri në fjalë, person shumë civil në sjellje, thjesht “ua zhtyti” edhe ca më shumë shqiptarëve…

Ja edhe mbyllja e e-mailit, gjithnjë me prirjen për t’u krahasuar me më të mëdhenjtë: “Pas kompanisë shtetërore Ruse Gasprom, Porti i Shëngjinit bëhet enti i dytë shtetëror që vlerësohet me një çmim të tillë Gold. Kjo vëmendje ndaj Shëngjinit ka bërë që edhe interesimi i të huajve drejt këtij porti të jetë shumë i madh vitet e fundit, ku nuk kanë munguar edhe investimet”. Lajmi është pozitive dhe duhet përshëndetur. Ai është një ftesë edhe për turkoshakët e administratës që “Të ecin më shpejt”!/Respublica