Firmën e kujt mban kërkesa për regjistrimin e PD-së në vitin 1990?

Zbulohet dokumenti origjinal i kërkesës dhe vendimit për regjistrimin e Partisë Demokratike. Teksti i kërkesës mban firmën e Eduard Selamit. Dokumenti është publikuar në faqen “politike.al”, nga Instituti i Studimeve Politike.

Bashkë me kërkesën janë depozituar 35 faqe dokumentacion, – programi minimal, statuti dhe lista emërore e 376 nënshkruesve. Kërkesa është bërë më 17 dhjetor 1990 dhe është miratuar nga ministri i Drejtësisë, Enver Halili, më 19 dhjetor 1990. Interesant është se në krye të shkresës së PD-së ende përdoret citimi “Republika Popullore Socialiste e Shqipërisë” dhe se kërkesa nuk mban emrin e kryetarit të Grupit Organizator, Hajdari, por të zotit Selami.

Në vendimin e ministrisë thuhet se kërkesa e PD-së është në përputhje me Kushtetutën e RPSSH-së, e cila në fakt është Kushtetuta komuniste e vitit 1976, që në nenin 3 theksonte se “PPSH-ja, pararoja e klasës punëtore, është forca e vetme politike udhëheqëse e shtetit dhe e shoqërisë. Në Republikën Popullore Socialiste të Shqipërisë, ideologjia sunduese është marksizëm-leninizmi. Në bazë të parimeve të tij zhvillohet gjithë rendi shoqëror socialist”….Gjithsesi, vendimi ligjëron PD-në, e cila është partia e parë antikomuniste dhe themeluese e pluralizmit politik në vitin 1990.