Nishani dekoron krushkun e Berishës.

Pas dhënies së dekoratës së “Flamurit Kombëtar” më 08 dhjetor 2015 Sali Berishës me motivacionin: “Shpirtit liridashës që iu bashkua dhe përcolli që në momentet e para frymën e lëvizjes mbarëpopullore demokratike në vitin ’90 që solli përmbysjen e regjimit më diktatorial e çnjerëzor komunist”, sot, presidenti i Republikës Bujar Nishani ka dekoruar edhe krushkun e ish-kryeministrit, Luan Malltezin me titullin “Mjeshtër i Madh”.

Motivacioni për këtë dekorim, ka qenë: “Në vlerësim të punës së tij të palodhur dhjetëra vjeçare në fushën e studimeve historike përmes botimeve të shumta shkencore, si dhe për kontributin e shquar të dhënë si historian dhe drejtues i institucioneve shtetërore që mbulojnë fushën e historisë dhe trashëgimisë kulturore për nxjerrjen në pah dhe bërjen të njohur të fakteve dhe figurave të shquara historike në kohë të ndryshme për kombin tonë”.

Në këtë ceremoni binte në sy mungesa e Sali Berishës, ndërkohë që ishte e pranishme vajza e tij Argita Malltezi, si dhe bashkëshorti i saj Jamarbëri, i biri i Luan Malltezit.

Por spikaste për elegancën e saj vajza e tyre Dasara Malltezi, e cila njihet ndryshe edhe me nofkën “Supermbesa”.