“3 shqiptarët u shkulnin dhëmbët atyre që nuk tregonin paratë”

Policia italiane e Napolit ka identifikuar 3 të fundit nga një bandë prej 8 anëtarësh, të gjithë shqiptarë të cilët kryenin vjedhje banesash dhe dhunonin pronarët e tyre. 5 anëtarë të tjerë janë arrestuar Dhjetorin e shkuar

Në të majtë është Enver Jakini për të cilin policia italiane pretendon se ishte anëtari më i dhunshëm i bandës. 49-vjecari ka qenë i dënuar më parë në Shqipëri për një vjedhje me pasojë vdekjen e një personi, ngjarje e ndodhur në vitin 1995 në Bulqizë.

Banda e shqiptarëve ku ai bënte pjesë vepronte kryesisht gjatë natës, dhe fokusi i tyre ishin vilat e izoluara. Në të gjithë rastet pronarët e vilave janë dhunuar, torturuar deri në thyerje dhëmbësh të shoqëruara këto me kërcënime me jetë. Ashpërsia e ushtruar bëhej për të marrë kodin e kasafortave si dhe për të zbuluar sendet me vlerë.

Në disa raste dhuna ushtrohej edhe në sy të të miturve.

Gjatë grabitjeve banda përdorte makina të vjedhura, kryesisht të shtrenjta. Policia ka sekuestruar një prej mjeteve në të cilin ka gjetur edhe armë të përdorura nga grabitësit, si dhe maska e dorashka të zeza.

Veç akuzave për vjedhje, armëmbajtje pa leje, plagosje të rëndë, ndaj shqiptarëve rëndon edhe ajo e tentativës për vrasje. Policia italiane njofton se hetimet për këtë bandë nisën 5 muaj më parë në tetor të vitit të shkuar.