Paska edhe kontrabandë të breshkave

Tingëllon paksa e pabesueshme, por në Maqedoni vidhen edhe breshkat. Banori i Gjevgjelisë, Zhivko Delixhakov, akuzon se nga ferma e tij para disa muajsh janë vjedhur breshka në vlerë prej gjysmë milion eurosh. Ai me biznesin e breshkave merret prej 30 vitesh tashmë, ndërsa në 12 vitet e fundit këtë e bën përmes firmës familjare.

Delixhakov akuzon se, në vjedhjen e breshkëve të tij janë të përfshirë njerëz që punojnë në mënyrë të paligjshme në Maqedoni, Ballkan dhe vendet europiane.

Bëhet fjalë, siç thotë ai, për mafie të breshkave e cila nga ky biznes në mënyrë të paligjshme bën qarkullim të disa milionë eurove. Ai shton se, më herët ka pasur vjedhje të vogla, por me këtë të fundit, i kanë shkaktuar dëm të madh.

“Dëmi shkon diku rreth 500 mijë euro. Gjithçka që kemi punuar në këto 10-12 vite, gjithçka që investuam në fermën familjare, për dy-tre netë ma kanë shkatërruar dhe vjedhur”,- tha Zhivko Delixhakov, rritës i breshkave.

Zhivko thotë se, vjedhjen e ka denoncuar në polici. Prokuroria gjithashtu ka kryer ekspertizë, por deri tani nuk ka epilog.

Ai dyshon se, vjedhësve u ndihmon dikush nga organet e ndjekjes dhe prandaj ata nuk zbulohen. Ai thotë se, kafshët e vjedhura nxirren jashtë Maqedonisë dhe dërgohen në vende të ndryshme.

“Breshkët dërgohen jashtë kufirit. Kam informata se më shumë dërgohen përmes liqenit të Dojranit, këtu në këtë pjesë, sepse rrethi jonë është shumë i pasur me breshka”,- shtoi Zhivko Delixhakov, rritës i breshkave.

Delixhakov thotë se, edhe përkundër asaj që ai ka pësuar dëme të mëdha, me vjedhjen shkatërrohet edhe kjo lloj kafshe. Ai është i gatshëm që drejtësinë ta kërkojë deri në fund, madje edhe jashtë kufijve të Maqedonisë.

“Shpëtim do të kërkoj nga të gjitha institucionet, e nëse nuk munden të bëjnë punë institucionet tona, unë kam argumente dhe fakte se kjo po përhapet gjithnjë e më shumë nëpër Europë dhe botë. Do të kërkoj ndihmë, qoftë nga Interpoli, qoftë nga Organizatat e huaja që kujdesen për natyrën. Do të kërkoj në mënyrë që të marr fund kjo punë”,- u shpreh Zhivko Delixhakov, rritës i breshkave.

Ndryshe, në fermën e Delixhakovit, breshkat e rritura shiten si kafshë shtëpie. Atje tani është periudha e dimërimit dhe breshkat janë të futura nën tokë. Sipas rritësve, breshkët janë pastruesit më të mëdhenj të hapësirës ku qëndrojnë dhe atje rrallë herë paraqitet ndonjë sëmundje.